Sinopsia
Hayao Miyazaki zuzendariaren istorio bizidun honek Satsuke eta Mei ikasle eta ahizpei jarraitzen die, beren landa-etxean aitarekin bizitzen jartzen diren bitartean. Inguruko ospitale batean dagoen ama gaixoa sendatu zain daude. Ahizpak etxe berria aztertzen ari direla, iratxo jostalari batzuk aurkitu eta haien lagun egiten dira, eta inguruko basoan Totoro izeneko izaki erraldoi bat aurkitu dute.
Gaiak
Haurtzaroa, natura, mitologia
Haurtzaroa. Bi neska ditu protagonista filmak, eta haien jolas eta fantasiazko unibertsoan murgiltzen da, haien poza eta samurtasuna transmitituz.
Natura. Landa- eta natura-ingurunea da filmaren beste protagonista bat: gizakien eta naturaren arteko harremana erakusten da, errespetuan eta harmonian oinarritua.
Mitologia. Totoroak milaka urteko zuhaitz erraldoi baten barruan bizi diren basoko hiru espiritu dira. Izaki hauek eta beste batzuk, katubusa esaterako, Miyazaki autoreak sortutakoak dira, baina Japoniako folklorean oinarrituak.
Filma ikusteko eta entzuteko iradokizunak
Pelikula bat modu askotara ikus eta entzun daiteke. Erreferentzi puntu batzuk eskaintzen ditugu. Zehazki pelikula modu honetara ikustea eta entzutea iradokitzen dizugu:
…barrura begira. Gutako bakoitzari esanguratsu egiten zaigun horri buruz eta gure bizitzan bertan sorrarazten dizkigun galderei buruz hausnartu. Helburua ez da betirako erantzunak aurkitzea, uzten dizkigun arrastoei erreparatzea baizik.
…kanpora begira. Taldean edota familian elkarrizketa sustatu. Kontua ez da ondorioetara iristea. Hauteman eta sentitu duguna konpartitzea, eta besteen hautemate ezberdina entzuten eta ulertzen saiatzea da.
…ez bakarrik arrazoiarekin, baita bihotzarekin ere. Une batez aurreiritzi ideologikoak eta edo aurrez ditugun ideiak albo batera utzi, pelikulak kontatzen digun horren harira, sentimenduek hitz egin dezaten.
…eta denbora baten buruan, berriz ere pentsatu. Adi erreparatu egun batzuen ostean pelikulak utzitako arrastoari. Arrasto hori ikusi dugunari buruzko hausnarketak eta istorioak gugan hartu duen biziak sortutako inpresioa da.
Zenbait galdera…
…pelikula ikusi aurretik
- Haurtzaroari buruz. Zer da haurtzaro zoriontsua izatea? Zer da baliotsuena haurtzaroan?
- Naturari buruz. Zer lotura dago haurtzaroan naturarekin? Nolakoa da gizakien eta naturaren arteko harremana gure gizartean?
- Mitologiari buruz. Zer lotura aurki daitezke mitologiaren eta naturaren artean? Mitologiak badu funtziorik gizakiaren bizitzan?
…pelikula ikusi ondoren
- Zer sentitzen du ahizpa zaharrenak etxe berrira iristean? Eta ahizpa txikiak?
- Deskriba ezazu bizi diren ingurunea hiru hitzekin. Zer aukera eskaintzen dizkie naturak?
- Zure ustez, nor da Totoro? Nola komunikatzen da neskekin? Zer balio ikasten dituzte?