Martxoaren 29an, larunbata, Urretxuko Hirugarren Espazioren aurkezpen ekitaldia ospatu zen, Urretxuko Bizikidetza Foroak antolatuta. Bertan, bizikidetza lantzeko espazioan egindako ibilbidea herritarrekin partekatu nahi izan zen. Izan ere, azken hiru urteetan 35 pertsona inguruk, bilera diskretuen bitartez iragan hurbilean izandako motibazio politikoko indarkeriaren inguruan hitz egiteko espazio bat eraiki dute Urretxun.
Talde hau bizikidetzaren inguruko lanketa handiago baten testuinguruan kokatzen da; duela zortzi urte hasitako ibilbidearen fruitua da. Hirugarren Espazioak egindako bidean, memoriaren lanketak lau helburutarako balio izan die: egia, justizia, erreparazioa eta bizikidetza lantzeko. Eta taldeak, beste hiruen garrantzia ukatu gabe, bizikidetzan jarri nahi du indarra. Era berean, modu partekatuan memoria eraikitzeko topatu dituzten erronketaz mintzatu ziren ekitaldian. Haien esperientziatik abiatuta, zera azaldu zuten: “batzen gaituena azpimarratzen saiatu gara eta ez elkarrengandik urruntzen gaituena indartzen”, eta memoriak ertz ugari baditu ere, “ukaezina da, iraganaren tratamendu partekatu batek, etorkizun baketsu bat eraikitzeko tresnak eskainiko dizkigula”.
Orain arte egindako lana plazaratzeaz gain, ekitaldian Hirugarren Espazioa eta Herritar Foroaren bitartez antolatuko diren ekintzetan parte hartzeko gonbidapena zabaldu zitzaien Urretxuko herritarrei. Taldeko kideek, hiru urtetan zehar bizi izan duten prozesua herritarrengana zabaldu nahi dute, elkarrizketarako espazio seguruak sortu nahi dituztelako, posible delako desberdinen artean hitz egitea, entzutea eta espazio komunak bilatzea, inor konbentzitzen saiatu gabe, guztien ikuspuntuak errespetatuz.
Baketikeko taldeak eskerrak eman nahi dizkie Urretxuko espazio anitzetan parte hartu duten eta hauengatik apustu egin duten pertsona orori. Hain zuzen ere, elkarrizketan eta partekatzean oinarritzen diren prozesuak beharrezkoak dira gure iraganetik abiatuta etorkizun hobe bat eraikitzeko.
“Hemen eta orain, bakean bizi nahi dugu, aske sentitzeko, partekatzeko eta auzokideen artean gozatzeko, behar diren baldintzak elkarrekin bilatuz, indarkeriak gure bizitza busti gabe.” (Urretxuko Hirugarren Espazioko taldearen manifestua)
Aintzane Gamiz eta Ainhoa Azkarate
Komunikabideetan: