Sinopsia
1978ko uda. Ignacio Cañas (Marcos Ruiz) Gironan bizi den 17 urteko ikasle barnerakoia da. Hiriko auzo txinatarreko gaizkile gazteak ezagutzean, Zarco (Chechu Salgado) eta Tere (Begoña Vargas), lapurreta-lasterketa geldiezin batean murgilduko da. Istorio honetan, Nacho adinez nagusitzen da, ongiaren eta gaizkiaren, justiziaren eta injustiziaren arteko lerroa gurutzatuz. Javier Cercasen nobelaren egokitzapena da.
Gaiak: diskriminazioa eta ezberdintasun soziala, indarkeria, presio soziala
- Diskriminazioa eta ezberdintasun soziala. Filmean klase baxuko eta erdikoen arteko ezberdintasunak agertzen dira, hala nola, bakoitzari dagozkion estereotipoak, aurreiritziak eta aukerak azaltzen dira. Klase baxukoek daukaten aukera ezagatik, lapurretan aritzen dira eta haien bizimodua biolentzian, drogetan eta trafiko xehetan oinarritzen dira. Bestalde, aipatzekoa da sarritan agertzen den genero-ezberdintasuna, emakumeen papera itzalean gelditzen baita eta objektu gisa ikusiak dira.
- Indarkeria. Biolentzia-mota ezberdinak identifika ditzakegu filmean hala nola: poliziala, tratu txarrak eta pobreei jasanarazitako diskriminazioa; ahozkoa (berbala), lapurretan azaltzeaz gain, pertsonaien hizkuntza oso bortitza da; bullyinga, Nachok hasieran jasaten dituen jazarpenak.
- Presio soziala. Taldean egokitzeko egin nahi ez dituen ekintzak egiten ditu Nachok, talde-presioa sumatzen da istorioan zehar. Dena dela, protagonistak argi du taldearen parte izateko eta onartua izateko, hainbat ekintza desatseginak egin beharko dituela.
Filma ikusteko eta entzuteko iradokizunak
Pelikula bat modu askotara ikus eta entzun daiteke. Erreferentzi puntu batzuk eskaintzen ditugu. Zehazki pelikula modu honetara ikustea eta entzutea iradokitzen dizugu:
…barrura begira. Gutako bakoitzari esanguratsu egiten zaigun horri buruz eta gure bizitzan bertan sorrarazten dizkigun galderei buruz hausnartu. Helburua ez da betirako erantzunak aurkitzea, uzten dizkigun arrastoei erreparatzea baizik.
…kanpora begira. Taldean edota familian elkarrizketa sustatu. Kontua ez da ondorioetara iristea. Hauteman eta sentitu duguna konpartitzea, eta besteen hautemate ezberdina entzuten eta ulertzen saiatzea da.
…ez bakarrik arrazoiarekin, baita bihotzarekin ere. Une batez aurreiritzi ideologikoak eta edo aurrez ditugun ideiak albo batera utzi, pelikulak kontatzen digun horren harira, sentimenduek hitz egin dezaten.
…eta denbora baten buruan, berriz ere pentsatu. Adi erreparatu egun batzuen ostean pelikulak utzitako arrastoari. Arrasto hori ikusi dugunari buruzko hausnarketak eta istorioak gugan hartu duen biziak sortutako inpresioa da.
Zenbait galdera…
… pelikularen aurretik
- Diskriminazioa eta ezberdintasun sozialari buruz: zer da normala? Eta desberdina? Zergatik baztertzen ditugu gizartearen egituratik kanpo dauden kolektiboak? Zer egin beharko genuke hori ekiditeko?
- Indarkeriari buruz: ze motatako indarkeriak ezagutzen ditugu gaur egun? Zertarako balio du? Zergatik? Helburu onak izan ditzake?
- Presio sozialari buruz: zer da presio soziala? Zergatik sortzen da? Zertara eramaten gaitu?
… pelikularen ondoren
- Zer datorkizu burura esaldi hau entzuterakoan?: “Haces lo mismo que nosotros pero no eres como nosotros. Tú tendrás cosas que perder, nosotros no”.
- Esetsaldian pistolak banatzen hasten dira haien artean, baina zergatik ez diote Tereri ematen?
- Poliziak Nachoren aitarekin hitz egiten duenean hau entzun dezakegu: “La ley es igual para todos. La vida no es igual para todos.” Zer esan nahi du Nachoren aitak azken esaldiarekin?
- Zergatik ez dute Nacho eramaten?
- Zein da emakumeen papera filmean? Hau da, zer berdintasunak eta ezberdintasunak aurki ditzakegu Tere eta Nachoren ama eta arrebaren artean?
- Nola jokatzen dute Gironako poliziek?
- Zein da Nachoren jarrera istorioaren hasieran eta bukaeran? Zergatik elkartzen da Nacho Tere eta El Zarcorekin?
- Zergatik erabakitzen dute banketxeak lapurtzea?