Datorren maiatzaren 2an, Baketik Fundazioak Bakerako Hiri eta Lurraldeen 5. Mundu Foroan parte hartuko du. Aurten Montevideon egingo da, “Bakerako eta Bizikidetzarako Gobernantza Parte-hartzailea indartzea” lelopean. Nazioarteko topaketa honek tokiko gobernuak, gizarte zibila eta nazioarteko erakundeak biltzen ditu, hiri indarkeriaren erronkei aurre egiteko irtenbide kolektiboak eraikitzeko.
Testuinguru horretan, Baketik-ek rol berezia izango du, “Eztabaida irekia: Bakerako Hiri Agenda kokatzeko funtsezko mezuak” saio paraleloa moderatuz, fundazioko zuzendari Maider Marañaren eskutik. Saio honen helburua da Buenaventura eta Santiago de Cali bezalako hirietan bake politika publikoak eraikitzeko prozesuaren ikaskuntzak partekatzea, PHARE Lurralde Globalak, APC Kolonbia eta eLankidetza erakundeek bultzatutako esperientziatik abiatuta.
Saioa bi eztabaida mahai irekietan garatuko da. Lehenengoan, hainbat lurraldetako ordezkariek —besteak beste, Mexiko Hiria, Bilbo, Montevideo, Canelones eta Katalunia— Bakerako Hiri Agenda askotariko testuinguruetan egokitzeko eta erreplikatzeko funtsezko elementuei buruz hausnartuko dute. Rol instituzional eta sozialak nola argitu, eragileen arteko espektatibak nola kudeatu, politika publiko parte-hartzaileak lehenestearen garrantzia, bakea tokiko politika ororen zeharkako ardatz gisa ulertzeko beharra eta ekintzetara ekarriko ez diren gehiegizko diagnostiko prozesuetan erortzeko arriskua izango dira eztabaidagai.
Bigarren mahaia bakerako aliantza estrategikoak sortzeko pentsatuta dago, eta, besteak beste, erakunde hauek hartuko dute parte: NBE-Habitat, Argentinako ESMA Memoriaren Gune eta Museoa eta Andeetako Sustapen Korporazioa (CAF). Gizarte, kultura eta nazioarteko eragileen inplikazio aktiboa sustatzeko eta denboran jasangarriak diren lankidetza sareak indartzeko estrategiak aztertuko dira.
Baketik-etik ulertzen dugu Bakerako Hiri Agenda bat kokatzeak printzipioak egokitzea baino gehiago dakarrela: tokian tokiko gaitasunak indartzea, parte-hartze aktiboaren bidez zilegitasuna eraikitzea eta lurralde bakoitzean dagoeneko existitzen den bake-ondarea ikusaraztea eskatzen du. Nazioarteko elkartrukerako espazio hau moderatzea aukera bat da bakearen kultura sustatzen jarraitzeko, tokikotik globalera, ekintza kolektiboaren eta eragile desberdinen arteko lankidetzaren bidez.
Informazio gehiago:
- Foro de Montevideo https://forodepazmvd.uy/